समशेर

अंधार दूर सरला,लक्ख पहाट झाली
सजली धरा मराठी,बुट्टीलुगडे ल्याली

ओलांडुनिया सारे,ग्रहताऱ्यांचे पसारे
धाडले श्रीहरीने, किल्ले शिवनेरी

निद्रा बहु दिनीची,आज असे सरली
पुत्र जन्मला गडी, जिजाऊ आई झाली

मातेच्या कडेवरूनी, मिरवीतसे खुशाल
बुरुज जुन्नर पेठ, सदर नी महाल

गोंडस म्हणे कोणी, कधी राजबिंडे
राजांचे प्रतिबिंब जणू, म्हणती कोणी लाडे

देवकथा ऐकोन,वर्षे सरली थोडी
शिक्षण सुरू जाहले, वाटे अवीट गोडी

भाषा विद्या कला,संतांची शिकवण
राज्यभ्यास कधी तो,कधी हरिकीर्तन

युद्ध तालीम रोजची, नेमे जोर बैठका
तलवार ढाल अभ्यास, भाला दांडपट्टा

दिवसागणिक मनीची, प्रतिमा स्पष्ट झाली
निराश चर्चा कानी, नसे कुणीच वाली

दिपावली तरीही, अंधार दाटलेला
माणुसकीवर घाला, गनिमाने घातलेला

कोवळ्या वयास माझ्या, एक जाणीव झाली
प्रत्युत्तरात हवी ती, रणधुरंधर खेळी

दुष्टसंहारे सह्याद्री, संग्रामी सरसावला
आबा दुरांतरावर, खेळवीत त्या शहाला

पुरे झाला छळ तो, लोपलीसे प्रतीक्षा
हे राज्य व्हावे हि तो, श्रींची इच्छा

सोबतीला सखे, अन् शुभाषिश सारे
प्रतिज्ञेस साक्षी, गड सूर्य चंद्र तारे

रायरेश्वरास साक्षी, रुधिराभिषेक झाला
बारा मावळ गर्जले, हर हर महादेव बोला

शुभारंभ कोठे, विचार पक्का झाला
कार्य सिद्धीस गेले, तोरणा सर केला

रयतेस अभय देण्या, उसळली समशेर
यज्ञास आरंभ झाला, आहुत्याही चीरथोर

मार्ग अन् उद्देश, असे जयाचा नीट
विश्वाचा नियंता, पुरवीत सर्व हट्ट

स्वराज्य स्थापन कारणे, शिवधनुष्य उचलला
वंदूनी शिवशंभू, श्रीगणेशा हा केला

छत्रपती शिवाजी महाराजसाहेब शहाजीराजे भोसले यांसी सादर प्रणाम!

©️विजयकुमार पानसरे